សត្វហ៊ីង

(បទកាកគតិ)

             

              ១.    ខ្ញុំជាសត្វហ៊ីង        ពោះធំកំពីង   កំប៉ោងអស្ចារ្យ

                      សត្រូវមកក្បែរ       ខ្ញុំប្រែក្រឡា    បំប៉ោងកាយា

                                                មាឌហាក់សម្បើម។

              ២.    ទោះធំតូចល្អិត       ហ៊ីងហាក់ខ្លាំងពិត                                  ពួកអួតឬទ្ធិឆ្នើម

                      សម្ញែងគេឯង        ឥតក្រែងស្លាប់ហើម                               អ្នកខ្លះរអើម

                                                ខ្ពើមខ្លាចគ្រប់គ្រា។

              ៣.   ហ៊ីងខ្ញុំខ្លាំងស្រែក   យំលឺហាក់ប្លែក                                     ហាក់ផ្អើលមេឃា

                      ហាក់បញ្ជាភ្លៀង     ធ្លាក់ទៀងវេលា                                     ហាក់មានឬទ្ធា

                                                 ខ្លាំងក្លាម្យ៉ាងដែរ។

              ៤.    សត្វហ៊ីងហាក់កាច អ្នកក្រុងហាក់ខ្លាច                                  ហាក់ពេញស្រុកខ្មែរ

                      តែផ្ទុយជនបទ       នឿយហត់ហូរហែរ                                 ក្នាញ់ហ៊ីងតាមស្រែ

                                                ដេញចាប់អាំងឆី។

              ៥.    អ្នកគួរកោតខ្ញុំ        ក្បាលពោះប៉ោងធំ                                 ពូកែស៊ឹងអី

                      តូចធំយំអួត           អំនួតហួសស្តី ខ្លាំងហាក់គ្មានអ្វី

                                                ប្រៀបស្មើខ្ញុំឡើយ។

២៣.១១.២០១១

លីម​ ចំរើន

http://limchamroeun.blogspot.com

សត្វកណ្តុរ

(បទក្របចក្រវាឡមេពាក្យ១២ថ្មី)

        ១.​​​​​    សត្វកណ្តុរ ត្បុលលួចលាក់ ជាក់មិនស្ងៀម ត្រៀមបំផ្លាញ

                ល្បិចមិនស្មាញ ក្រាញមិនស្មុគ ចុកចាប់ចិត្ត គិតឆីលះ

                ហាក់គ្មានព្រឺ​ ឌឺសត្វឆ្មា ក្លាអំនួត អួតក្នុងផ្ទះ

                ចាប់មិនឈ្នះ ព្រះមិនស្គាល់ ញ័រស្រេកឃ្លាន ហ៊ានខ្វារ ក។

        ២.    នៅផ្ទះមនុស្ស ជុះអាចមន៍ស៊ី ទីជំរក ស្មោកគ្រោកក្រៃ  

                សត្វចង្រៃ ច្នៃរំខាន ប្រាណគួរខ្ពើម ជ្រើមមិនល្អ

                ទាំងថ្ងៃយប់ ភពប្រទះ លះបំផ្លាញ ក្រាញបន្ត

                ទោះអង្វរ ក៏មិនស្តាប់ ប្រាប់មិនតាម ហាមហាក់ពើយ។

        ៣.​    គង់មានថ្ងៃ ក្រៃស៊យស៊ុន ធ្ងន់វិបត្តិ កាត់មិនបាន

                អាចជាប់ប្រាណ បានឆ្មាឆី ភ័យងាប់រស់ ព្រោះព្រងើយ

                បើនៅឌឺ គឺមនុស្សខឹង នឹងព័ទ្ធចាប់ ស្លាប់សត្វឈ្លើយ

                ដែលប្រឹងងើយ ពើយព្រហើន ផ្គើនអាងយ៉ាង កាងក្នុងផ្ទះ។

នៅៈថ្ងៃសៅរ៍ ទី១៩ ខែវិច្ឆិកា ឆ្នាំ២០១១ (ម៉ោងៈ ២១ៈ៣៥ នាទីថ្ងៃយប់)

Tel: ០១២ ៥១៩ ១៣៧/០១១ ៣៧៨ ១៧១/010 730 083

http://limchamroeun.blogspot.com

កូនអើយឥតម៉ែ!

(បទកាកគតិ)

    ១.  កូនអើយឥតម៉ែ!               គ្មានពុកជួយថែ               ឃុំគ្រងរក្សា

         រស់នៅនឹងគេ                  ទុក្ខទ្វេខ្លោចផ្សា               ប្រទេចផ្តាសា

                                             ព្រឹកល្ងាចរាល់ថ្ងៃ។

    ២.  កូនគេត្រសង                  ហាក់សប្បាយផង           ព្រួតគ្នាទាត់វ៉ៃ

         មួយដៃមួយជើង               រូបយើងថោកក្រៃ            ហាក់គ្មានតម្លៃ

                                             សម្បត្តិជាមនុស្ស។

    ៣.  ពួកខ្ញុំខុសអ្វី?                   ខ្វះអ្នកប្រណី                  ហាក់ចង់ជ្រែកពុះ

         បានចិញ្ចឹមហើយ             ម្តេចឡើយមិនលុះ          មេត្តាធម៌មនុស្ស

                                             គិតពួកខ្ញុំផង។

    ៤.  បើមិនស្រលាញ់               ខន្តីឈប់ក្នាញ់                បង្កើតសៅហ្មង

         វាយដំច្រំធាក់                  ជំពាក់ពៀរផង                លំបាកស៊ីសង

                                             តជាតិមុខទៀត។

    ៥.  នេះគឺរឿងពិត                  ខ្ញុំមិនប្រឌិត                    បង្កវិវាទ

         តែសុំប្រាថ្នា                    គ្រួសារមូលញាតិ            ឈប់រងទុក្ខទៀត

                                             ដូចកូនគេឯង។

   

នៅៈថ្ងៃសៅរ៍ ទី១២ ខែវិច្ឆិកា ឆ្នាំ២០១១ (ម៉ោងៈ ២១ៈ៤៥ នាទីយប់)

Tel: ០១២ ៥១៩ ១៣៧/០១១ ៣៧៨ ១៧១/010 730 083

http://limchamroeun.blogspot.com

នរណាយល់ខ្ញុំ?

បទកាកគតិ)

  ១  .     នរណាយល់ខ្ញុំ?               ទុក្ខសោកពូនផ្តុំ            មិនងាយគេយល់

            គេច្រើនមើលងាយ           និយាយអំពុល             គ្មានស្វែងឬសគល់

                                                ចំណងបញ្ហា។

  ២  .     កើតពីពោះម្តាយ              គ្រប់ស្ត្រីទាំងឡាយ       គា្មនអ្នកប្រាថ្នា

            ធ្វើស្រីលក់ខ្លួន                 ខុសក្បួនមាត្រា            សីលធម៌ខេមរា

                                                ឲ្យខូចបង់ទេ។

  ៣ .     តើធ្វើយ៉ាងម៉េច?              រៀនសូត្របានតិច        ត្រូវចាញ់បោកគេ

            ខូចខុសបង់កាយ             យ៉ាប់ស្រាយព្រួយទ្វេ     ជីវិតទន់ទេរ

                                                រេដូចចុងស្រល់។

  ៤  .     ជាម្តាយឬកូន                  ទោះបីស្លាប់សូន្យ         ត្រូវស្រាយកង្វល់

            ចិញ្ចឹមប្អូនបង                  ត្រសងខ្វាយខ្វល់         រកប្រាក់ផ្ញើផ្តល់

                                                ផ្គត់ផ្គង់គ្រួសារ។

  ៥  .     លះកេរ្តិ៍កាត់ខ្មាស់             ស៊ូរងកម្មក្រាស់            ទាសីតណ្ហា

            បំរើប្រុសព្រាន                 ដែលមានដុល្លារ           ចិត្តព្រើលសាវា

                                                ក្បត់កូនប្រពន្ធ។

  ៦  .     ក្បត់ទាំងខ្លួនឯង               ធ្វើឫកសម្ញែង              ហាក់ខ្លាំងពេកពន់

            អាងលុយចាយផ្គើន          ព្រហើនស្តីធ្ងន់             ភ្នែកប្រឹងគយគន់

                                                ស្រីដូចសំរាម។

  ៧ .     គ្មានក្តីអាណិត                 អាសូររឿងពិត             ខ្ញុំយំរហាម

            តស៊ូលេបលាក់                មិនខ្ជាក់ប្រឹងហាម        មិនទោរទន់តាម

                                                ពាក្យគេមើលងាយ។

  ៨  .     ទ្រាំលាក់ម៉ែឪ                  កំបាំងអាស្រូវ              មិនហ៊ាននិយាយ

            ស៊ូយ៉ាប់ម្នាក់ឯង               លីសែងទូលស្ពាយ       ប្រឹងស្រាយសំពាយ

                                                ចំណោទបញ្ហា។

  ៩  .     តែខ្ញុំសុំចិត្ត                      មេត្តាអាណិត              ពួកខ្ញុំផងណា

            ឈប់សើចតិះដៀល         ដំនៀលផ្តាសា             ពួកខ្ញុំត្រូវការ

                                                កិត្តិយសដូចគ្នា។

  ១០.     បើមានឱកាស                 ខ្ញុំអាចប្រែផ្លាស់            ពិតស្បថស្មារលា

            ឈប់ធ្វើខុសខូច               ឲ្យដូចនិន្ទា                  ប្រឹងស្វែងវិជ្ជា

                                                សាងជីវិតថ្មី។

           

  នៅៈថ្ងៃសៅរ៍ ទី០៦ ខែវិច្ឆិកា ឆ្នាំ២០១១ (ម៉ោងៈ ១១ៈ៤៥ នាទីយប់)

Tel: ០១២ ៥១៩ ១៣៧/០១១ ៣៧៨ ១៧១/010 730 083

http://limchamroeun.blogspot.com

ត្រដោកក្របី

(បទកាកគតិ)

    ១.   តេកតោក!តេកតោក!          សឹកមាត់ត្រដោក         ឆ្អែតពោះក្របី

          ម្តេចប្រឹងបន្លឺ                      អ្នកឌឺរកអ្វី?                 ខ្ញុំមិនយល់ន័យ

                                                សម្លេងអ្នកទេ។

    ២.   អ្នកគ្រាន់ឧបករណ៍             ក្របីពាក់ក                  លម្អអួតគេ

          កុំខ្លាំងតែស្រែក                  សម្រែកដូចជេរ            ក្រែងសោករឹតទ្វេ

                                                មនុស្សប្រហារ។

    ៣.  បន្លឺឲ្យឆ្លាត                        មានច្បាប់ក្បួនខ្នាត       សម្លេងភាសា

          អ្នកផងនិងយល់                 ឫសគល់បញ្ហា             ក្របីនោះណា

                                                អាចយ៉ាប់ដូចគ្នា។

    ៤.   តែអ្នកទ្រាំទៅ                    ក្របីស៊ីស្រួវ                 កុំល្បិចនិន្ទា

          ព្រោះអ្នកនិងសត្វ               វិបត្តិដូចគ្នា                  រំខានគ្រប់គ្រា

                                                បក្សពួកតែមួយ។

    ៥.   បើអ្នកឃើញខុស               ម្តេចមិនព្រមចុះ            ពី-កឃាត់ជួយ

          ខ្លាំងតែតម្លង់                      ឲ្យថ្ងង់ឲ្យព្រួយ             តែក្នុងរលួយ

                                                ពួយស៊ីដូចគ្នា។

នៅៈថ្ងៃសៅរ៍ ទី២៩ ខែតុលា ឆ្នាំ២០១១ (ម៉ោងៈ ១១ៈ៣៥ នាទីថ្ងៃត្រង់)

Tel: ០១២ ៥១៩ ១៣៧/០១១ ៣៧៨ ១៧១

http://limchamroeun.blogspot.com