ខ្ញុំជាប៊ិច

(បទក្របចក្រវាឡមេ១២ថ្មី)

                        ១.      ខ្ញុំជាប៊ិច  រេចក្បាលរុយ ស្អុយកេរ្តិ៍ឈ្មោះ ព្រោះនរណា?

                             ប្រើខ្ញុំចារ ហាមិនខ្មាស់ ផ្លាស់គំនិត​ គិតទុច្ចរិត

                             សាងទង្វើ ធ្វើមិនសម ក្រមសីលធម៌ ញ័រក្នុងចិត្ត

                             ប្រាថ្នាគិត ស្និទ្ធតែប្រាក់ ដាក់សែនឲ្យ ក្រោយសញ្ញេរ។

                   ២.      ខ្ញុំជាប៊ិច គេចមិនបាន ប្រាណជាប់ដៃ ក្រៃអភ័ព្វ

                             ម្ចាស់បានទ្រព្យ ងាប់តែខ្ញុំ ធំសោយទុក្ខ មុខគេជេរ

                             ត្បិតម្ចាស់គិត ពិតមិនអី ភ័យឃ្លាតឆ្ងាយ កាយសុខទ្វេ

                             បើសញ្ញេរ ទេរគំនិត ចិត្តពិសពាំ នាំខ្ញុំយំ។

                   ៣.      ខ្ញុំជាប៊ិច លិចលង់ខ្លួន ពួនកើតទុក្ខ មុខសែនខ្មូរ

                             ខ្មាស់ម្ចាស់ប្រូ ប្តូរសុំប្រាក់ ដាក់ហោប៉ៅ ក្រៅសង្គម

                             សេសទឹកប៊ិច ភ្លេចក្រិតក្រម សមឬទេ គេសើចយំ

                             ស្អុយរងំ ជ្រំទង្វើ ធ្វើទុច្ចរិត គិតក្រោយខ្នង។

                   ៤.      ខ្ញុំជាប៊ិច ធ្មេចទ្រាំឈឺ ឮនិន្ទា ជាទំលាប់

                             ពិតចង់គាប់ ងាប់ក៏ដោយ ឲ្យពីរោះ ឈ្មោះល្បីម្តង

                             កុំប្រើខ្ញុំ ផ្តុំគំនិត គិតខុសផ្លូវ នៅសៅហ្មង

                             ម្ចាស់កុំប៉ង ចងឲ្យយ៉ាប់ ស្លាប់អ្នកក្រ ល្អតែឯង។

                   ៥.​​      ខ្ញុំជាប៊ិច ភ្លេចមិនបាន ប្រាណឲ្យគិត ចិត្តអាសូរ

                             អ្នកក្រថ្នូរ សូររងំ យំរងគ្រោះ ព្រោះសញ្ញេរ ជេរក្តែងក្តែង

                             ឈប់ទៅម្ចាស់ ផ្លាស់គំនិត ចិត្តបំពាន ហ៊ានឥតក្រែង

                             ខ្មាស់គេឯង តែងចារផ្តាស់ ម្ចាស់ឈប់អន់ សន្តោសខ្ញុំ។

លីម ចំរើន

៣០.០៦.២០១២

http://limchamroeun.blogspot.com

ឫកអ្នកមាន

http://limchamroeun.blogspot.com

(បទក្របចក្រវាឡមេ១២ថ្មី)

                        ១.      ឫកអ្នកមាន ឃ្លានតែប្រាក់ ដាក់សម្ញែង ស្តែងអ្នកក្រ
                             ខ្លះមិនល្អ កករចិត្ត គិតពិសពុល យល់មិនបាន
                             ក្រៅសោភា ងារហាក់ហំ ចំអ្នកមាន ហ៊ានហួសស្មាន

                             ឱកាសបាន ប្រាណមិនស្ងៀម ត្រៀមល្បិចស្នៀត ឆ្លៀតប្រចាំ។

                   ២.      ឫកអ្នកមាន ញៀនសម្លុត ហុតអង្កៀម ឈាមអ្នកក្រ

                             ទោះអង្វរ ត្រដរខ្យល់ ខ្វល់សោកព្រួយ ជួយនាំសាំ

                             អ្នកមានខ្លះ ច្បាស់មិនគិត ចិត្តមេត្តា ថាផលកម្ម

                             ធ្វើប្រចាំ ចាំប្រវញ្ច័ ខ្លាញ់អ្នកអត់ ខ្សត់វេទនា។

                   ៣.      ឫកអ្នកមាន ស្ពានចម្លង ឆ្លងចិត្តយក្ស ជាក់សាហាវ

                             ដូចជើងប៉ាវ កាវក្រសោប ឱបប្រយោជន៍ ខ្មោចចិត្តមារ

                             ឫកនេះណា ចារជាប់ចិត្ត ស្អិតជាប់ខ្លួន ពួនគ្រប់គ្នា

                             ចាំវេលា គ្រាចំណេញ ចេញប្រល័យ វ៉ៃប្រហារ។

                   ៤.      ឫកអ្នកមាន ហ៊ានឈប់ទៅ នូវទង្វើ ធ្វើអាស្រូវ

                             អាសូរទៅ ត្រូវអាណិត ចិត្តខន្តី ក្តីមេត្តា

                             ដល់អ្នកខ្សត់ អត់ចំណី ឆីគ្រប់គ្នា ជាអាហារ

                             កុំផ្តាសា ថាមើលងាយ វាយឫកឆ្មើង ឡើងហួសមេឃ។

                   ៥.      ឫកអ្នកមាន រៀនរស់គិត​ ពិតតម្លៃ ថ្លៃបំផុត

                             ឈប់សម្លុត ហុតបឺតឈាម ត្រៀមល្បិចស្នៀត ឆ្លៀតខ្លាំងពេក

                             ក្រែងអភ័ព្វ ជាប់កម្មចាស់ ផ្លាស់រងទុក្ខ មុខសង្វេគ

                             ផ្តើមព្រួយស្លេក ដេកមិនស្ងប់ ឡប់ខ្វល់ខ្វាយ ឆ្ងាយមង្គល។

លីម ចំរើន

១៦.០៦.២០១២

ឫកអ្នកក្រ

http://limchamroeun.blogspot.com

(បទក្របចក្រវាឡមេ១២ថ្មី)

                        ១.      ឫកអ្នកក្រ ត្រដរខ្យល់ ខ្វល់រកប្រាក់ ដាក់សម្ញែង

                             អួតគេឯង ស្តែងអ្នកមាន រៀនល្បិចស្នៀត ឆ្លៀតដូចគេ

                             ខ្លះក្រពិត ចិត្តលោភលន់ ធ្ងន់ប្រមាណ ប្រាណគ្នាន់គ្នេរ

                             ចិត្តវៀចវេ ទេរចរិត គិតទង្វើ ធ្វើផ្តេសផ្តាស់។

                   ២.      ឫកអ្នកក្រ សអាចខ្មៅ ខ្លៅព្រោះលុយ ស្អុយទង្វើ

                             មារយាទភ្លើ ល្ងើវង្វេង ឃ្លេងឃ្លោងចិត្ត គិតបញ្ច្រាស់

                             ភ្លេចខុសត្រូវ នូវទំលាប់ ធ្លាប់ធ្វើល្អ កករផ្លាស់

                             ជួនជាក់ច្បាស់ ខ្លះវេទនា ជាឧបករណ៍ ល្អគេលេង។

                   ៣.      ឫកអ្នកក្រ ល្អផូរផង់ ត្រង់សុចរិត ចិត្តប្រពៃ

                             ច្រើនភក្តី ភ័យដំនៀល ដៀលមើលងាយ វាយដូចក្មេង

                             ក្រខ្លះហំ សមគោរព ភប់សរសើរ ស្មើបទភ្លេង

                             គេប៉ិនលេង ភ្លេងញ័រញាក់ ជាក់ច្រើនបទ កត់មិនអស់។

                   ៤.      ឫកអ្នកក្រ កករពិត ចិត្តខ្លះឆ្កួត អួតសព្វយ៉ាង

                             ខ្លះក្អេងក្អាង សាងមារយាទ ឃ្លាតថ្លៃថ្នូរ ប្តូរចិត្តស្មោះ

                             ព្រោះឆោតល្ងង់ លង់ល្បិចឆ្លៀត ស្នៀតអ្នកមាន ហ៊ានដូរដោះ

                             ចុងក្រោយខ្សោះ អស់តម្លៃ ថ្លៃប្រែថោក បោកតគ្នា។

                   ៥.​​      ឫកអ្នកក្រ តអក្ខរា ចារបំភ្លឺ គឺច្រើនក្រៃ

                             មានសាបប្រៃ ថ្លៃនិងថោក សោកសប្បាយ ឆ្ងាយពណ៌នា  

                                    ជាអ្នកក្រ ល្អក្នុងចិត្ត គិតប្រពៃ ន័យធៀបគ្នា

                              សុខហូរហៀរ គ្រាស្មោះត្រង់ ផ្ចង់គំនិត ពិតមង្គល។

លីម ចំរើន

២៣.០៦.២០១២

ឆ្ងាញ់ឆ្កួតក្តិត

http://limchamroeun.blogspot.com

(បទក្របចក្រវាឡមេ១២ថ្មី)

                        ១.      ឆ្ងាញ់ឆ្កួតក្តិត ពិតវេទនា គ្រាពេលក្រោយ ឲ្យទុក្ខភ័យ

                             គឺឆ្កួតស្រី អ្វីក៏អស់ ខ្សោះចិត្តកាយ ណាយជីវិត

                             ឆ្កួតប្រាថ្នា ការងារល្វើយ នើយប្រឹងធ្វើ ល្ងើល្ងង់ល្ងិត

                             វក់វីចិត្ត ស្អិតជាប់កាយ បាយលែងឃ្លាន ហ៊ាន់លះបង់។

                   ២.      អ្នកខ្លួនមួយ ព្រួយកើតទុក្ខ មុខឡើយស្លេក ដេកមិនបាន

                             ចិត្តរុញច្រាន ប្រាណជ្រើមជ្រួល ខ្មួលត្របាញ់ ក្នាញ់តម្រង់

                             ប្រឹងស្វែងរក មកសប្បាយ កាយភ្លេចខ្វល់ ឆ្ងល់ប្រឹងចង់

                             អារម្មណ៍ស្រង់ ត្រង់ស្រើបស្រាល ដាលលូតដុះ ខុសឥតគិត។

                   ៣.      អ្នកមានគ្នា​ ជាសង្សារ ថ្លាចិត្តកាយ ខ្វាយខ្វល់គ្មាន

                             ខ្លះភ្លេចរៀន ឃ្លានកាមគុណ ពន្ធប្រុសស្រី ឆីរួមរឹត

                             កាត់កេរ្តិ៍ខ្មាស់ ផ្លាស់ទង្វើ ធ្វើធ្លាប់ត្រូវ ទៅខុសពិត

                             ព្រោះក្ត.ក្តិត គិតស្រមៃ ក្រៃមិនស្វាង កាងរែកពន្ធ។

                   ៤.      ប្តីសាវា ការពេញច្បាប់ យ៉ាប់ដូចគ្នា គ្រាវង្វេង

                             បីដូចភ្លេង លេងឲ្យស្តាប់ ស្លាប់ចិត្តកាយ ណាយប្រពន្ធ

                             ជួនភ្លេចកូន សូន្យនឹកនា គ្រាបានក្តិត ស្និទ្ធផ្គាប់ផ្គន់

                             ភ្លេចស្រាលធ្ងន់ គន់ខុសត្រូវ នូវទង្វើ ធ្វើមិនសម។

                   ៥.      ទាំងនេះគឺ ឮគ្រប់គ្នា ជាការពិត ក្តិតផ្តល់គ្រោះ

                             ដល់ប្រុសងោះ ព្រោះឆ្ងាញ់ក្តិត ពិតផ្តល់ទុក្ខ មុខក្រៀមក្រំ

                             ពេលអ្វីៗ ន័យគ្មានពិត ចិត្តខុសខក បកមិនសម

                             សោកវាយដំ ខំរឹតចុក សុខរសាត់ បាត់មង្គល។

លីម ចំរើន

២៤.០៦.២០១២

ស្រមោចភ្លើង

http://limchamroeun.blogspot.com

(បទក្របចក្រវាឡមេ១២ថ្មី)

                        ១.      ស្រមោចភ្លើង ជើងទោះខ្លី ល្បីខ្លាំងខាំ ចាំប្រហារ

                             រាល់ហេតុការណ៍ ណាបំពាន ហ៊ានរំខាន ប្រាណយាយី

                             សត្វមិនខ្លាច  កាចឥតងោះ មោះមុតចិត្ត គិតនាទី

                             ប្រឹងវក់វី គ្នីគ្នាផ្តុំ ធំតូចរុំ ជុំប្រល័យ។

                   ២.      ស្រមោចភ្លើង ជើងទោះខ្លី ល្បីគួរស្ញើប ស្រើបខាំឈឺ

                             អ្វីហ៊ានឌឺ គឺឈឺចាប់ យ៉ាប់មិនខាន ប្រាណស្រមៃ

                             ទោះសត្វល្អិត ពិតពូកែ ខ្មែរស្គាល់ច្បាស់ ណាស់រាល់ថ្ងៃ

                             សាមគ្គីក្រៃ ក្ស័យមិនខ្លាច អាចលះបង់ ត្រង់ប្រយោជន៍។

                   ៣.      ស្រមោចភ្លើង ជើងទោះខ្លី ល្បីស្មោះស្មគ្រ័ ហាក់ចិត្តមួយ

                             តែងលើកស្ទួយ ជួយគ្នីគ្នា ជាទង្វើ ធ្វើគួរស្ងោច

                             ខុសសត្វរៃ ល្បីប៉ិនច្រៀង ល្អៀងគំនិត គិតអសោច

                             ខាតប្រយោជន៍ ខ្លោចដួងចិត្ត ពិតវេទនា គ្រាយ៉ាប់ក្រោយ។

                   ៤.      ស្រមោចភ្លើង ជើងទោះខ្លី ល្បីសាមគ្គា ជាទំលាប់

                             បីដូចទ័ព្ធ ងាប់មិនព្រឺ ឌឺវាខាំ ផ្តាំឲ្យហើយ

                             ទោះបីមនុស្ស នោះធំក្រៃ ដៃជើងមាន ហ៊ានក៏ដោយ

                             វានិងឲ្យ សោយឈឺចាប់ ​យ៉ាប់ដូចគ្នា ជាមេរៀន។

លីម ចំរើន

០៧.០៦.២០១២

http://stgchamroeun.wordpress.com

ចិត្តសចិត្តខ្មៅ ​

(បទ បន្ទោលកាក ឬ បទ ពំនោលកាក) របៀបទី១

         

                   ១.      ចិត្តសចិត្តខ្មៅ ​                             ចិត្តខ្មៅសំដៅសព្វការ

                             ចិត្តសថ្លៃថ្លា                                ចិត្តខ្មៅផ្តាសាថាជ្រិញ។

                   ២.      ចិត្តសឃើញខុស                         ចិត្តខ្លៅណេះណុះនោះវិញ

                             ចិត្តសសុំទិញ                              ចិត្តខ្មៅខ្ពើមជ្រិញរឹតខូច។

                   ៣.      ចិត្តសចេះគិត                              ចិត្តខ្មៅវិញពិតកំហូច

                             ចិត្តសមិនខូច                              ចិត្តខ្មៅប្រដូចដៀលល្ងង់។

                   ៤.      ចិត្តសមិនខ្វល់                             ចិត្តខ្មៅច្របល់លិចលង់

                             ចិត្តសល្អគង់                               ចិត្តខ្មៅទេល្ងង់តែឯង។

                   ៥.      ចិត្តសត្រឹមត្រូវ                             ចិត្តខ្មៅភ្លាត់ផ្លូវចំបែង

                             ចិត្តសប្រឹងសែង                          ចិត្តខ្មៅខែងរែងមិនស្តាប់។

                   ៦.      ចិត្តសឆ្ងាយទុក្ខ                            ចិត្តខ្មៅសមមុខប្រែស្លាប់

                             ចិត្តសប្រឹងប្រាប់                          ចិត្តខ្មៅមិនស្តាប់ហួសពេល។

លីម ចំរើន

០២.០៦.២០១២ (ម៉ោងៈ ២ៈ០៥ នាទីព្រឹក)

http://limchamroeun.blogspot.com

ហេតុអ្វីភិតក្បត់?

(បទ បន្ទោលកាក ឬ បទ ពំនោលកាក) របៀបទី២

         

                   ១.      ហេតុអ្វីភិតក្បត់?                          ជូរចត់សាវាធ្វើអ្វី?

                             គួរទេជាប្តី                                   មានស្រីលួចលាក់ខាងក្រៅ។

                   ២.      គ្រួសារសុខសាន្ត                         ស្មោះស្មានប្រែប្រាណខួរខ្លៅ

                             នាំភ្លើងឆេះក្តៅ                            ពីក្រៅបំផ្លាញសិរី។

                   ៣.      បាត់អស់មង្គល                            អំពល់ព្រួយសោករីងរៃ

                             ហេតុព្រោះឆ្កួតស្រី                        បានអីសល់ត្រឹមសោកព្រួយ។

                   ៤.      ស្រីដូចតែគ្នា                               បែរជាប្រឹងស្វែងជំនួយ

                             ឆ្កួតស្រីលេខមួយ                         យ៉ាប់ជួយផ្តល់តែបញ្ហា។

                   ៥.      បីច្រូចឆ្ងាញ់ឬ?                            ប្រឹងឌឺក្បត់ប្រែសាវា

                             ពិតគ្មានអស្ចារ្យ                            កាមាឆីណាស់ឃ្លានក្រៃ។

                   ៦.      នេះគឺជីវិត                                  រឿងពិតរស់នៅរាល់ថ្ងៃ

                             ភិតក្បត់ថោកក្រៃ                         តម្លៃមនុស្សប្រែសូន្យ។

លីម ចំរើន

០២.០៦.២០១២

(ម៉ោងៈ ១ៈ៣៥ នាទីព្រឹក)

http://limchamroeun.blogspot.com

មនុស្សអាក្រក់

http://limchamroeun.blogspot.com/

(បទក្របចក្រវាឡមេ១២ថ្មី)

                        ១.      មនុស្សអាក្រក់ ល្អក់ក្នុងចិត្ត ពិតមុខក្រាស់ ផ្លាស់មិនចេញ

                             ជេរនៅស្ញេញ ដេញមិនឆ្ងាយ កាយហាក់រម្យ ទមលាក់ល្បិច

                             ធៀបប្រុសព្រាន ឃ្លានតែស្រី ឆីកាមគុណ ធ្ងន់កលកិច្ច

                             ចិត្តប៉ងក្តិច ច្បិចដូចឃ្មុំ ទំក្រេបផ្កា សាវាក្បត់។

                   ២.      មនុស្សអាក្រក់ ដក់គំគួន ពួនព្យាបាទ ផ្លាតចិត្តព្រះ

                             ប្រាថ្នាឈ្នះ លះសុចរិត គិតទង្វើ ធ្វើជូរចត់

                             មិនខ្លាចបាប​ ឆ្អាប់ដោយកម្ម ត្រាំចិត្តមារ ជាប្រាកដ

                             ប៉ិនបែនបត់ ស្បថបំភាន់ ជាន់បំពាន ហ៊ានគ្រប់យ៉ាង។

                   ៣.      មនុស្សអាក្រក់ សក់ជ្រៀកល្អិត គិតគ្រប់ស្នៀត ឆ្លៀតឱកាស

                             គិតច្រើនណាស់​ ផ្លាស់ទំលាប់ ធ្លាប់ធ្វើល្អ បវរសាង

                             កេងប្រវ័ញ្ច ផ្ចាញ់ផ្ចាលគ្នា មារចិត្តយក្ស ជាក់ក្អេងក្អាង

                             ឫកប្រឹងកាង តាងទង្វើ ធ្វើជាប់ស្អិត គិតកំបាំង។

                   ៤.      មនុស្សអាក្រក់ បក់មិនប៉ើង ឡើយឃើញជាក់ លាក់ចិត្តមារ

                             គ្រប់មនុស្សម្នា ជាការពិត ឋិតក្នុងខ្លួន ពួនដូចខ្មាំង

                             ចាំសម្លាប់ ចាប់អ្នកខ្សោយ ឲ្យខ្វាយខ្វល់ ផលវាខ្លាំង

                             យ៉ាប់តតាំង ច្បាំងប្រហារ អាក្រក់មនុស្ស នោះច្រើនក្រៃ។

លីម ចំរើន

២៩.០៥.២០១២

ថើបមួយខ្សើត

បទក្របចក្រវាឡមេ១២ថ្មី)

       

  ១.ថើបមួយខ្សើត ស្រើតអារម្មណ៍ ក្រំរសាត់ បាត់ទៅឆ្ងាយ

  ហាក់សប្បាយ កាយវង្វេង លេងល្បិចស្នៀត ឆ្លៀតកេសកៀវ

  ដៃមិនស្ងៀម ត្រៀមក្រសោប ឱបស្រស់ស្រី ភ័យតែស្រៀវ

  ប៉ិនខាងរាវ ស្ទាវចរិត គិតឥតព្រឺ គឺឆ្កួតកាម។

  ២.ថើបមួយខ្សើត ភ្លើតភ្លើនចិត្ត គិតច្របល់​ ខ្វល់មិនហាម

  ប្រឹងឆ្កួតតាម កាមកើនក្រាស់ ផ្លាស់ទង្វើ ធ្វើពាលា

  មិនបានគិត ស្និទ្ធតែថ្ពាល់ ពាល់បំពាន ហ៊ានបំពារ

  អាចឈ្លោះគ្នា គ្រាគេខឹង​ នឹងមានគ្រោះ ព្រោះមួយខ្សើត។

លីម ចំរើន

២៥.០៥.២០១២

ខ្ញុំត្រូវឈប់ខុស

(បទបថ្យាវត្ត)

            ១.  ចិត្តលោភល្មោភជ្រើមហាក់ខ្ពើមក្តីសុខ                   កាមរាគអុកឡុកគិតរឿងឥតន័យ

              មានគ្រួសារហើយនៅឡើយលួចឆី                        ស្រីមួយពីរបីហាក់មិនស្ងប់ចិត្ត។

            ២.  ឬមួយរូបខ្ញុំទុក្ខព្រោះតែក្តិត                                     កាមគុណជាប់ស្អិតខ្ញុំស្រាយមិនបាន

                  មានប្រពន្ធកូនមិនផ្តល់សុខសាន្ត                            បែរប្រឹងរុញច្រានឲ្យសោយទឹកភ្នែក។

            ៣.  បីដូចជាឃ្មុំទ្រនំបាក់មែក                                        ញាតិមិត្រយំយែកកូនចៅវេទនា

                  គ្រួសារសុខុមហាក់ត្រូវកំព្រារ                                 រស់រងរងាក៏ព្រោះខ្លួនឯង។

            ៤.  នេះហើយឫកខ្ញុំចិត្តធំជាក់ស្តែង                              ហ៊ានមកលេងល្បែងបំផ្លាញគ្រួសារ

                  ជាប្រុសចិត្តព្រានស្តែងឫកសាវា                             បីដូចសត្វឆ្មាល្បិចលាក់ក្រចក។

            ៥.  ឬធៀបរូបខ្ញុំបីដូចជាចក                                          ដែលអណ្តែតខកចាកឆ្ងាយផុតច្រាំង

                  ខ្លួនឯងខ្សោយទេតែចិត្តហាក់ខ្លាំង                          ចង់ល្បងកំលាំងតតាំងល្បែងស្នេហ៍។

            ៦.  ដឹងខុសការពិតតែមិនព្រមកែ                                 ឬចង់ប៉ោឡែដល់ក្ស័យសង្ខារ

                  ទើបខ្លួនអស់ចិត្តចាញ់ល្បែងស្នេហា                       ដែលក្នុងលោកាមិនងាយអ្នកឈ្នះ។

            ៧.  តើពេលណាទៅទើបខ្ញុំប្រឹងលះ                              ដុសលាងឲ្យជ្រះកំអែលសាវា

                  ដែលលាក់ក្នុងចិត្តក្រាស់ក្តាំងអស្ចារ្យ                      ឈប់ឆ្កួតស្នេហាគ្រួសារសុខសាន្ត។

            ៨.  ឱ!ប្រពន្ធអើយនិងកូនពីរប្រាណ                             សង្សារកណ្យាណបងពិតខុសក្រៃ

                  បើបោះចោលមួយមួយពិតអាល័យ                        ឬមានតែក្ស័យទើបខ្ញុំផុតទុក្ខ។

            ៩.  បើធ្វើបែបនេះដូចមិនសមមុខ                                 ក្នុងនាមឪពុកជាមេគ្រួសារ

                  មានតែលះចិត្តកាត់ពីសង្ខារ                                   ចាំសាងស្នេហានៅជាតិក្រោយវិញ។

            ១០.ទាល់ធ្វើដូចនេះទើបផុតទុក្ខម្នេញ                           ដែលនៅទួកទេញបំផ្លាញអារម្មណ៍

                  បើចិត្តមិនដាច់ពិតនៅតែក្រំ                                    ទោះសមមិនសមខ្ញុំត្រូវឈប់ខុស។

លីម ចំរើន

ថ្ងៃអង្គារ ទី២២ ខែឧសភា ឆ្នាំ២០១២(ម៉ោងៈ ២ៈ១០នាទីព្រឹក)

ស្ម័គ្រឈឺព្រមទាំងពីរប្រាណ

(បទបថ្យាវត្ត)

១.       ភ្នែកខ្ញុំប្រឹងធ្មេចបំភ្លេចរូបស្រី                    តែហាក់ឥតន័យធ្មេចឥតបានការ

          ព្រោះវង្សភក្រ័្តស្រីផ្តិតជាប់ចិន្តា                  ទោះចង់ប្រាថ្នាក៏លុបមិនបាន។

២.      បើរឹងបំភ្លេចទុក្ខមករំខាន                         ហាក់ធ្លាក់ក្នុងឋានស្នេហ៍ក្នុងសុបិន

          ពិតដូចមិនពិតត្រឡប់ត្រឡិន                   ម្តងឆៅម្តងឆ្អិនឲ្យខ្ញុំវង្វេង។

៣.      ទោះចង់រត់គេចមាត់ថាឈប់លេង             តែចិត្តឃ្លោងឃ្លេងកាត់មិនដាច់ឡើយ

          ព្រោះខ្ញុំឈានហួសពិបាកបកក្រោយ         ខ្ញុំ.នាងលេងហើយគ្មានអ្នកចង់ចាញ់។

៤.      ទាំងដឹងការពិតមិនគួរស្រលាញ់                តែចិត្តត្របាញ់ស្រលាញ់ជ្រុលហួស

          បើឈប់ឥលូវពិតគ្មានអ្វីជួស                    ក្រៅពីជំនួសសោយទុក្ខពីរប្រាណ។

៥.      ម្យ៉ាងព្រោះស្នេហ៍នេះទើបផ្តើមសុខសាន្ត    ពិតមិនចង់បានទឹកភ្នែកនោះទេ

          តើធ្វើម្តេចទៅទាំងខ្ញុំទាំងគេ                      ស្នេហ៍រួមរឹតទ្វេគ្មានអ្នកចង់ឈប់។

៦.      ក៏ដឹងដូចគ្នាស្នេហ៍ដូចថ្ងៃយប់                   ព្រលឹមព្រលប់ជួនអណ្តែតលិច

          ពិបាកខ្លាំងណាស់កាត់ចិត្តបំភ្លេច              បីដូចថ្ងៃលិចគ្មានអ្នកឃាត់វា។

៧.      ឯស្នេហ៍ពួកខ្ញុំអាចធៀបដូចគ្នា                  ជួនក្តៅរងានិន្ទាចុងក្រោយ

          ស្នេហ៍ខុសច្បាប់ក្បួនផុងខ្លួនទៅហើយ       ឱ!ម្ចាស់ថ្លៃអ្ហើយខ្ញុំជ្រើសផ្លូវណា?

៨.      ម្ខាងប្រពន្ធកូនម្ខាងជាសង្សារ                   តើចោលមួយណាឬទុកមួយណី?

          បើម្នាក់ម្ខាងៗសុទ្ធស្មោះភក្តី                     គ្រាន់មួយចាស់.ថ្មីតម្លៃដូចគ្នា។

៩.      ឬខុសពីរខ្ញុំចិត្តល្មោភពាលា                      ឆ្កួតកាមចិត្តមារអាត្មានិយម

          តាំងខ្លួនជាព្រានឫកដូចសត្វឃ្មុំ                 ប៉ងឲ្យស្រីយំទើបខ្ញុំអស់ចិត្ត។

១០.    នេះគឺទុក្ខធំដូចចំរៀងពិត                         ទុក្ខសោករួមរឹតព្រោះប្រពន្ធពីរ

          គ្មានទុក្ខអ្វីស្មើនៅលើធរណី                      កាយមួយចិត្តពីរលំបាកបែងចែក។

១១.    បើផ្គាប់ចិត្តម្ខាងម្ខាងពិតយំស្រែក              ទ្រូងខ្ញុំស្ទើរបែកពេលគិតម្តងៗ

          មិនគួរអ្វីខ្ញុំមិនស្រាយចំណង                    បែរប្រឹងរឹងចងលេងល្បែងស្នេហា។

១២.    មានប្រពន្ធហើយប្រឹងលួចសាវា                ឬកម្មពៀរចារបន្សល់ជាតិមុន?

          អាណិតជាងគេកូនហើយប្រពន្ធ                តែទុក្ខរឹងធ្ងន់ស្រីខ្ញុំស្រលាញ់។

១៣.   បើខ្ញុំនិងនាងពិតមិនព្រមចាញ់                  រឹងរឹតស្រលាញ់ដល់ថ្ងៃបែកគ្នា

          ស៊ូរកាត់កេរ្តិ៍ខ្មាស់រងពាក្យនិន្ទា                  ព្រោះស្នេហ៍ហូរហៀរដួសអស់មិនបាន។

១៤.    មានតែស្ម័គ្រឈឺព្រមទាំងពីរប្រាណ           ទើបស្នេហ៍ទៅបានបន្តខាងមុខ

          ទ្រាំលេបគ្រួសថ្មរង់ចាំសោយទុក្ខ              បីដូចជាប់គុកដែលឥតស្រមោល។

១៥.    សូមផ្តាំប្រុសស្រីកុំប្រឹងតាមបោល             ឈោងចាប់ស្រមោលស្នេហ៍ដូចសុបិន

          មានគូឥតគូកុំធ្វើឯងប៉ិន                          លេងល្បែងស្នេហ៍សិនខុសដូចពួកខ្ញុំ។

លីម ចំរើន

ថ្ងៃអាទិត្យ ទី២០ ខែឧសភា ឆ្នាំ២០១២(ម៉ោងៈ ៣ៈ១០នាទីព្រឹក)

http://limchamroeun.blogspot.com

កុំត្រាប់តាមខ្ញុំ

(បទបថ្យាវត្ត)

            ១. ដឹងដែរឮដែរតែគេចមិនបាន              អារម្មណ៍រំខានបង្ខំឲ្យគិត

                ដូចមេឃស្រឡះផ្លាស់ប្រែងងឹត         ទុក្ខសោករួមរឹតខ្ញុំព្រួយម្នាក់ឯង។

            ២. ដឹងដែរស្នេហ៍នេះបីដូចជាផ្សែង         ឬដូចជាល្បែងគង់ចាញ់រហាម

                ហេតុអ្វីក៏ខ្ញុំនៅប្រឹងឆ្កួតតាម               មាត់ខ្ញុំប្រឹងហាមតែចិត្តមិនស្តាប់។

            ៣.មិនឃើញមុខម្តងចិត្តហាក់ប៉ងស្លាប់     ស្នេហ៍ខ្ញុំម្តេចយ៉ាប់សាងឡើងខុសគេ

                ប្រុសច្រើនគគោកខ្ញុំមិនស្នេហ៍ទេ       ឬកម្មបុព្វេស្នេហ៍ប្រុសមានម្ចាស់។

            ៤. ចំណែករូបគេក៏ស្នេហ៍ខ្ញុំណាស់          ស៊ូកាត់កេរ្តិ៍ខ្មាស់ឆ្លៀតជួបរាល់ថ្ងៃ

                បើធ្វើយ៉ាងនេះម្តេចដាច់អាល័យ        ឱព្រះម្ចាស់ថ្លៃខ្ញុំគិតយ៉ាងណា។

            ៥. បើបន្តទៀតពិតរងទុក្ខា                     ស្រក់ទឹកនេត្រាថ្ងៃមួយមិនខាន

                ឬមួយកម្មខ្ញុំតាមមករំខាន                 ខ្ញុំគួរទប់ប្រាណខ្លាចរងកម្មក្រាស់។

            ៦. តើធ្វើម្តេចទៅទើបខ្ញុំស្វាងច្បាស់?       ឈប់ស្នេហ៍ផ្តេសផ្តាស់ផ្លាស់ចិត្តស្រស់ថ្លា

                ជួយប្រាប់ខ្ញុំផងត្រូវធ្វើបែបណា          ឈប់ឆ្កួតស្នេហាស្រវាប្តីគេ។

            ៧. កុំត្រាប់តាមខ្ញុំសុខុមគ្មានទេ            ទុក្ខសោករឹតទ្វេឆ្កួតក្នុងសុបិន

                សូមស្រីគ្រប់ប្រាណកុំស្មានឯងប៉ិន     ស្នេហ៍ត្រូវគិតសិនខ្លាចខុសដូចខ្ញុំ។

លីម ចំរើន

(តែងសម្រាប់នារីម្នាក់)

១៩.០៥.២០១២ (ម៉ោងៈ ៩ៈ២០នាទីព្រឹក)

http://limchamroeun.blogspot.com