ឆីណាស់ឃ្លានណាស់

បទពាក្យ៨

     ១.  តន្រ្តីប្រគុំរងំដួងចិត្ត                                     កៀកកើយនែបនិត្យជិតជាប់ស្រីក្មេង

          លូកលេងប្រឡែងដូចពុលបទភ្លេង                 អារម្មណ៍ចិត្តវង្វេងហាក់អស្ចារ្យ។

     ២. ពួកប្រុសព្រានអាងប្រាក់ដាក់សម្ញែង              អួតស្រីក្មេងថ្លែងស្តែងឫទ្ធជេស្តា

          អាងប្រាក់រកងាយស្ពាយសុទ្ធដុល្លារ                ស្រីក្មេងស្រវាខ្វា.កបងកាយ។

     ៣. ខា.រ៉ា.អូ.ខេ បំពេរអារម្មណ៍                            បំបាត់ក្រៀមក្រំខំសើចសប្បាយ

          មាត់ប្រឹងស្រែកច្រៀងភ្នែកដៀងឆោមឆាយ      ចាយលុយភ្លេចស្តាយកាយភ្លេចភិតភ័យ។

     ៤.  ស្អែកឡើងផ្តើមព្រួយរំជួយដួងចិត្ត                  អ្នកខ្លះផ្តើមគេងគិតតើបានអ្វី?

          សុខក៏ឃ្លាតបាត់ស្ងាត់តាមរូបស្រី                   សោយសុខឥតន័យឆីណាស់ឃ្លានណាស់។

       

លីម ចំរើន ៣០.០៣.២០១២

http://limchamroeun.blogspot.com

ស្នេហាប្រុសស្រី

បទបថ្យាវត្ត

    ១. ស្នេហាប្រុសស្រីចំណីទុក្ខសោក              ប្រុសស្នេហ៍ស្រីបោកគេថាប្រុសព្រាន

        ពេលប្រុសរងទុក្ខសមមុខមេរៀន              ឯស្រីចិត្តហ៊ានគេថាខុសធ្ងន់។

    ២. ស្រីស្រស់ស្រើបស្រាលត្រអាលកាមគុណ វាចាទន់ភ្លន់ជាមន្តពិសពុល

        ពង្វក់គ្រប់ប្រុសខូចខុសយ៉ាប់យល់           ស្រីជាដើមគល់ចំណោទបញ្ហា។

    ៣. បើប្រុសវង្វេងឆ្កួតល្បែងស្នេហា                ពិតសោយសោកាចិន្តាខ្លោចពិត

        ដុះតែកាមគុណរែកពន់ជាប់ស្អិត              ដើរគិតដេកគិតខ្វះក្តីសុខសាន្ត។

    ៤. នេះគឺការពិតប្រឌិតមិនបាន                    ប្រុសស្រីសព្វឋានតែងជួបគ្រប់គ្នា

        ស្នេហានេះសោតបញ្ឆោតគ្រប់គ្រា            បើប្រឹងឆីវាវេទនាពេលក្រោយ។                     

លីម ចំរើន

៣០.០៣.២០១២

http://limchamroeun.blogspot.com

អំណាចប្រាក់

អំណាចប្រាក់

 (បទក្របចក្រវាឡ មេពាក្យ១២ថ្មី)

                   ១.​​​​​      អំណាចប្រាក់ ដាក់ស្នេហ៍មនុស្ស ជុះមិនចេញ ដេញមិនឆ្ងាយ

                             ខ្លះខ្វល់ខ្វាយ កាយមិនស្ងៀម ត្រៀមល្បិចស្នៀត ឆ្លៀតពេលខ្សត់

                             ស៊ីសំណូក សូកចំណេញ ចេញចំនួន ក្បួនកំណត់

                             ប្រាក់ឲ្យបត់ ក្បត់គ្នីគ្នា ជាប្រចាំ កម្មមិនខ្លាច។

                   ២.      អំណាចប្រាក់ ស្មគ្រ័អ្នកមាន ឃ្លានអ្នកក្រ ត្រដរខ្យល់

                             អ្នកខ្សត់ខ្វល់ ឆ្ងល់ចង់មាន ហ៊ានដូនយក្ស លាក់ចិត្តកាច

                             ធ្វើគ្រប់យ៉ាង កាងពាលា កៀរប្រយោជន៍ ខ្មោចក៏ខ្លាច

                             ស្តែងឫទ្ធសាច បាចល្បិចប៉ិន មិនខ្លាចគ្រោះ ព្រោះតែប្រាក់។

នៅៈ ថ្ងៃអាទិត្យ ទី១១ ខែមីនា ឆ្នាំ២០១២ (ម៉ោងៈ ២១ៈ២០នាទី យប់)

Tel: ០១២ ៥១៩ ១៣៧/០១១ ៣៧៨ ១៧១/០១០ ៧៣០ ០៨៣

http://limchamroeun.blogspot.com

អំណាចទ្វាចិត្ត

(បទបន្ទោលកាក) របៀបទី២

          ,

          ១.      អំណាចទ្វាចិត្ត                                     កោងកាចមែនពិតគួរខ្លាច

                   បើឲ្យបាចសាច                                    ពិតកើនអំណាចឲ្យព្រួយ។

          ២.      ទ្វាចិត្តផ្តល់ទុក្ខ                                     ក្តីសុខនៅមុខជាមួយ

                   មិនមានអ្នកជួយ                                  ក្រៅពីជំនួយខ្លួនឯង។

          ៣.      ទ្វាចិត្តមនុស្ស                                      ត្រូវប្រឹងដុសឈូសចេះក្រែង

                   ឃុំគ្រងខ្លួនឯង                                     ក្តីទុក្ខចំបែងពិតឆ្ងាយ។

          ៤.      ទ្វាចិត្តមានប្រាំ                                     ព្រះពុទ្ធលោកផ្តាំបកស្រាយ

                   បណ្តោយអន្តរាយ                                នាំចិត្តបែកសាយខុសផ្លូវ។

          ៥.      ទី១ផ្លូវភ្នែក                                          នាំចិត្តបែកមែកពេកកូវ

                   ជួនភ្លេចខុសត្រូវ                                   នាំឲ្យធ្លាក់ផ្លូវកាមគុណ។

          ៦.      ឆ្កួតរូបល្អស្អាត                                     ចិត្តគំនិតផ្លាតគយគន់

                   ស្រមៃពេកពន់                                     ភ្លេចទោសស្រាលធ្ងន់នាំគ្រោះ។

          ៧.      ដូចវង្វេងទ្រព្យ                                     ឃើញគេមានភ័ព្វចង់ឈ្លោះ

                   ផ្ចាញ់ផ្ចាលកេរ្តិ៍ឈ្មោះ                            សម្ញែញទ្រព្យយសបៀតបៀន។

          ៨.      ខ្លះប្រែច្រណែន                                   ប្រើល្បិចបត់បែនចិត្តហ៊ាន

                   ព្រោះក្រចង់មាន                                  ភ្នែកនាំឲ្យញៀនភ្លេចគិត។

          ៩.      ខ្លះចាស់ជាក់ស្តែង                                បែរប្រឹងតុបតែងប្រឌិត

                   រាល់ថ្ងៃប្រឹងគិត                                    មិនសូវស្ងប់ចិត្តខ្វាយខ្វល់។

          ១០.    ជ្រើមជ្រួលវង្វេង                                   ចាស់ចង់ធ្វើក្មេងច្របល់

                   ហាក់ភ្លេចហេតុផល                             កាយចាស់កម្មផ្តល់ធម្មជាតិ។

          ១១.    ទី២ផ្លូវមាត់                                          ខ្លាំងគ្មានអ្នកឃាត់ចោលម្សៀត

                   ស្តីគ្មានមារយាទ                                   ប៉ិនប្រើល្បិចស្នៀតពិសពុល។

          ១២.   មាត់ខ្លះគួរខ្លាច                                     មាត់មន្តអំណាចយ៉ាប់យល់

                   និយាយមង្គល                                     និយាយផ្តើមគល់បញ្ហា។

          ១៣.   មាត់ខ្លះសំភី                                        ស្តីហួសនាទីវោហារ

                   មិនច្បាស់ត្រង់ណា                               ពេលខ្លះស្តីថាហួសច្បាប់។

          ១៤.    ចុងក្រោយគេទាន់                                ភ័យស្លន់ដូចមាន់គេចាប់

                   ពេលខ្លះអាចស្លាប់                               មិនបានស្តីប្រាប់ផ្តែផ្តាំ។

          ១៥.    មាត់ខ្លះគួរស្អប់                                     ប៉ិនស្តីឡិកឡប់ប្រចាំ

                   ណែនាំមិនចាំ                                      អ្នកផងលឺសាំគ្មានន័យ។

          ១៦.    ទី៣ច្រមុះ                                            ទ្វាអាចនាំខុសគិតខ្លី

                   អាងក្លិនមិនអី                                      វង្វេងថ្ពាល់ស្រីមិនខ្វល់។

          ១៧.   មាត់ថា,ភ្នែកគន់                                   សប្បាយកាមគុណសោយសល់

                   ទ្វាបីនាំខ្វល់                                         នាំចិត្តច្របល់វង្វេង។

          ១៨.    ច្រមុះផ្តេសផ្តាស់                                  ទោះមនុស្សចាស់ផ្លាស់ក្មេង

                   ឈ្លក់ក្លិនផ្សេងៗ                                  នាំចិត្តឃ្លោងឃ្លេងសោកព្រួយ។

          ១៩.    ពេលក្លិនទៅបាត់                                 ចិត្តសោកព្រួយស្កាត់រំអួយ

                   ត្រូវការជំនួយ                                       សោយក្លិនបាត់ព្រួយម្តងទៀត។

          ២០.   ទ្វានេះអាចគ្រោះ                                  បាត់បង់កេរ្តិ៍ឈ្មោះបង់ម្សៀត

                   បើឥតមារយាទ                                    អាចនំាចិត្តឃ្លាតក្តីស្ងប់។

          ២១.   មនុស្សល្អជា                                        អាចត្រូវវេទនាស្ទើឡប់

                   ច្រមុះបន្លប់                                          ហិតក្លិនមិនស្អប់វង្វេង។    

          ២២.   ទី៤ត្រចៀក                                         ទ្វាអាចនាំងាកបែកឆ្វេង

                   ពេលខ្លះដូចក្មេង                                  គេនិយាយលេងសរសើរ។

          ២៣.   បែរជាមិនគិត                                      បណ្តោយឲ្យចិត្តហោះហើរ

                   មិនទប់ដំណើរ                                     ឆ្កួតពាក្យសរសើរសប្បាយ។

          ២៤.   ដល់ពេលយូរទៅ                                  សរសើរមិននៅឃ្លាតឆ្ងាយ

                   បែរព្រួយចិត្តស្តាយ                               នាំសោកខ្វល់ខ្វាយមិនស្វាង។

          ២៥.   ជួនឮមិនច្បាស់                                    នាំចិត្តខំណាស់ប្រឹងសាង

                   ដល់គ្មានអ្វីអាង                                    ចិត្តធ្លាប់ក្អេងក្អាងឈប់អួត។

          ២៦.   ត្រចៀកខ្លះយ៉ាប់                                  នាំគ្រោះដល់ស្លាប់ឬឆ្កួត

                   ព្រោះតែអំនួត                                      គេសរសើរអួតប្រឹងគិត។

          ២៧.   ទី៥ទ្វាកាយ                                         នាំសោកសប្បាយដល់ចិត្ត

                   ជួនឲ្យព្រួយពិត                                    ខ្ញុំមិនប្រតិដ្ឋកំប្លែង។

          ២៨.   ដូចកាយស្គមធាត់                                ចិត្តនាំឲ្យមាត់ចំបែង

                   រអ៊ូថ្លាថ្លែង                                            ចិត្តខ្មាសគេឯងព្រោះកាយ។

          ២៩.   កាយខ្លះធ្លាប់ស្រួល                              ដល់ពេលប្រែប្រួលនឹកស្តាយ

                   សោកព្រួយស្អប់បាយ                           លែងឃ្លានជិនណាយឆ្អែតចិត្ត។

          ៣០.   ដូចកាយខ្លះខ្មៅ                                   ព្រួយចិត្តសោកសៅគេងគិត

                   ចង់សល្អពិត                                        ខំតុបតែងប្រិតខ្វាយខ្វល់។

          ៣១.   ដូចខ្លះកាយ.ស                                    ដល់ខ្មៅមិនល្អច្របល់

                    ចិត្តព្រួយសល់វល់                                ចំបែងស្ទើខ្យល់មិនស្ងប់។

          ៣២.   អ្នកខ្លះកាយចាស់                                 ចិត្តព្រួយប្តូរផ្លាស់ចង់ឡប់

                    តែងកាយគួរស្អប់                                 ចាស់កាយត្រឡប់ចង់ក្មេង។

          ៣៣.  នេះរឿងជាក់ស្តែង                                មិនមែនកំប្លែងលលេង

                    ទ្វាប្រាំដូចភ្លេង                                     ពង្វក់វង្វេងដល់ចិត្ត។

          ៣៤.   បើគ្រងមិនល្អ                                      ពិតល្អក់កករជីវិត

                    អាចវិភាគគិត                                      ខ្ញុំមិនប្រឌិតអត្ថន័យ។

          ៣៥.   ក្រែងខុសខ្ពស់ទាប                               តែងមិនសុភាពថាស្តី

                    សូមត្រាប្រណី                                     អ្នកអានប្រុសស្រីខ្ញុំផង។

                                                                                     

លីម ចំរើន (០១.០៤.២០១២)​ ម៉ោង៩ៈ៣០នាទីព្រឹក

http://limchamroeun.blogspot.com

ឫកអ្នកផឹកស្រា

(បទបន្ទោលកាក) របៀបទី១

          ១.      ឫកអ្នកផឹកស្រា                                      វោហារភ្លេចក្រែងតែងអួត

                    ផឹកច្រើនដូចឆ្កួត                                    ដេកក្អួតគេខ្ពើមមិនក្បែរ។

          ២.      ឯអ្នកខ្លះទៀត                                       ចោរម្សៀតស្តីថាប៉ោឡែ

                    អ្នកផងមិនស្នេហ៍                                   ថៅកែសេដ្ឋីសុំខ្មាស់។

          ៣.      អ្នកខ្លះខ្សត់ទេ                                       ស្តីវេរអួតឆ្នើមបញ្រ្ចាស់

                    ក្មេងសឹងភ្លេចចាស់                                ឬផ្លាស់ចាស់ថោកជាងក្មេង។

          ៤.      ចិត្តស្លូតប្រែកាច                                    កំណាចចិត្តហ៊ានអ្នកលេង

                    ខួរក្បាលវង្វេង                                      ឃ្លោងឃ្លេងភ្លេចដឹងខុសត្រូវ។

          ៥.      ឥតខ្លាចអ្នកណា                                    មិនថាបងប្អូនម៉ែឪ

                    ប្រែថោកអាស្រូវ                                    សល់នៅសោកស្តាយក្រោយស្វាង។

          ៦.      ទោះចង់បកក្រោយ                                គ្មានឡើយអ្វីមកសំអាង

                    ហេតុទង្វើសាង                                     ត្រេងត្រាងស្រវឹងព្រោះស្រា។

          ៧.      ខ្ញុំមិនប្រតិដ្ឋ                                          ការពិតជាក់ស្តែងច្បាស់ការណ៍

                    ឫកអ្នកផឹកស្រា                                     វោហារសម្បើមឥតក្រែង។

          ៨.      បើបានអានហើយ                                  សូមឆ្លើយទប់ចិត្តខ្លួនឯង

                    កុំអាងខែងរែង                                      សម្ញែងយកស្រាធ្វើលេស។

          ៩.      ទោះបីអ្នកប្រាជ្ញ                                     ប្រែអាចគំនិតមិនផេះ

                    ឆ្កួតស្រាដូច្នេះ                                       ចំណេះអាចប្រែជាសូន្យ។

          ១០.    បើផឹកឲ្យក្រែង                                      គេឯងប្រពន្ធនិងកូន

                    តម្លៃកុំសូន្យ                                          ដូចក្បូនគ្មានអាងពឹងអ្វី។     

លីម ចំរើន (៣០.០៣.២០១២)​ ម៉ោង៤ៈ៣០នាទីល្ងាច

http://limchamroeun.blogspot.com

តើរូបខ្ញុំចង់បានអ្វី?

បទភុជង្គលីលា

     ១.    តើរូបខ្ញុំចង់បានអ្វី?                                    សូមជួយរកន័យ     ប្រណីប្រាប់ផង។

     ២.    ដួងចិត្តខ្ញុំសែនសៅហ្មង                             ព្រួយសោកទ្វេដង     ចំណងរួមរឹត។

     ៣.    ដូចមេឃប្រែផ្លាស់ងងឹត                             ពពកខ្មៅជិត     បាំងបិតសូរិយា។

     ៤.    ជីវិតគ្រួសារនេះណា                                  តើគេត្រូវការ     ប្រាថ្នារកអ្វី? ។

     ៥.    ត្រូវការបុណ្យសក្ក័ផ្ទះ,ប្តី                             លុយកាក់ស្រាស្រី ឬស្អីប្រាកដ?                                            

     ៦.    ដូចមិនត្រូវតាមកំណត់                               នាំខ្ញុំជូរចត់     ប្រាកដនោះទេ។

     ៧.    អ្វីខ្ញុំចង់បានជាងគេ?                                 គេងគិតគ្នាន់គ្នេរ     គ្រប់ពេលដង្ហើយ។

     ៨.    ដូចស៊ីបាត់ស្រៈលើហើយ                          ភផ្សំមឆ្លើយ     ងកើយគចាំ។

     ៩.    ពួកគេហៅលមកផ្តាំ                                  ថាខ្ញុំរងកម្ម     ចាំថ្នាំផ្សំគ្នា។

     ១០.  ពាក្យនេះនាំឲ្យខ្ញុំជា                                   ទើបប្រឹងស្ទុះស្ទា     គ្រប់គ្រាខ្ញុំហៅ។

     ១១.  សូមឲ្យខ្ញុំឆ្លាតឈប់ខ្លៅ                              ដួងចិត្តសោកសៅ     ឈប់ក្តៅ,ត្រជាក់។

     ១២.  មេត្តាអ្នកអានបញ្ចាក់                                 ឆ្លើយពាក្យខ្ញុំលាក់     ថាជាក់គឺអ្វី? ។

១៦.០៣.២០១២​​ លីម ចំរើន

http://limchamroeun.blogspot.com

សំណោកគ្រឹះក្រោមអគារ

បទភុជង្គលីលា

     ១.  សំណោកគ្រឹះក្រោមអគារ                    យ៉ាប់យ៉ើនគ្រប់គ្រា     គ្រប់គ្នាជួយផង។

     ២.  គ្រឹះខ្ញុំធ្ងន់កាយកន្លង                           តែផលតបស្នង     ហាក់សងមិនស្មើ។

     ៣. អគារស្អាតគេសរសើរ                         សប្បាយជួល,ប្រើ     គ្រាន់បើអគារ។

     ៤.  ឯគ្រឹះក្រោមខ្ញុំវេទនា                           តវ៉ាទាមទារ     គ្រប់គ្រាបានអ្វី?

     ៥.  ត្បិតម្ចាស់អគារប្រុសស្រី                     ស្តាប់មិនយល់ន័យ     មិនភ័យគ្រឹះក្រោម។

     ៦.  ប្រឹងតែងអគារអួតឆោម                       ឯគ្រឹះហិតផោម     ខាងក្រោមខ្លោចចិត្ត។

     ៧. អគារស្រស់ស្អាតប្រណិត                    អ្នកផងឆ្ងាយជិត     ស្នេហ៍ស្និទ្ធបំផុត។

     ៨.  ពេលអគាររលំស្រុត                           បែរភ័យតក់ស្លុត     សម្លត់ជេរគ្រឹះ។

     ៩.  ឡូឡាទាំងទទឹងទិស                          វាចាដូចពិស     ដៀលគ្រឹះមិនល្អ។

     ១០.មិនគិតហេតុផលខ្មៅ,ស                     តើគ្រឹះមិនល្អ     ឬក៏ព្រោះជាង។

លីម ចំរើន​

១៤.០៣.២០១២

http://limchamroeun.blogspot.com

លុយនិងសុភមង្គល

(បទភុជង្គលីលា)

         

          ១.  លុយនិងសុភមង្គល                 គួរតែស្វែងយល់                 ឫសគល់បញ្ហា។

          ២. តើយកលុយឬគ្រួសារ?             ព្រោះពេលខ្លះណា              តវ៉ាមិនបាន។

          ៣. មានមួយបាត់មួយមិនខាន        មិនងាយគាប់ប្រាណ           ហួសស្មានទាយត្រូវ។

          ៤.  ខ្លះប្រឹងធ្វើរឿងអាស្រូវ              គិតសព្វគ្រប់ផ្លូវ                  លុយនៅចិត្តខ្វល់។

          ៥.  សុភមង្គលគ្មានផ្តល់                 គ្រួសារច្របល់                   សុខសល់គ្មានឡើយ។

          ៦.  ប្រពន្ធ,ប្តីឈ្លោះឥតស្បើយ        កូនចៅមុនក្រោយ              ផលឲ្យយំយែក។

          ៧. ដូចរៀនសូត្រមិនបែកមែក        ចុងក្រោយទឹកភ្នែក             ពុះជ្រែកផែនថ្ពាល់។

          ៨.  សុភមង្គលលែងស្គាល់             ស្នេហ៍លុយភ្លេចធម៌           ញ៉ាមពាល់ក្រោយព្រួយ។

          ៩.  នេះគ្រាន់គំនិតជំនួយ               គ្រាន់ដាស់តឿនជួយ           លើកស្ទួយទឹកចិត្ត។

          ១០.កុំឲ្យមង្គលងងឹត                     ព្រោះលុយបាំងបិទ             ជាក់ពិតស្តាយក្រោយ។

          ១១.ឆ្កួតតែសប្បាយសែបសោយ     លុយពង្វក់ហើយ                ផ្តល់ឲ្យអាប់យស។

          ១២.អាចបាក់បែកគ្រួសារគ្រោះ       ដូចស្លាប់ទាំងរស់                ធ្លាក់ជ្រោះអវចី។                

នៅៈ ថ្ងៃពុធទី០៨ ខែមីនា ឆ្នាំ២០១២ (ម៉ោងៈ ១៦ៈ២០នាទី រសៀល)

Tel: ០១២ ៥១៩ ១៣៧/០១១ ៣៧៨ ១៧១/០១០ ៧៣០ ០៨៣     
http://limchamroeun.blogspot.com