សូមទុក្ខឃ្លាតទៅ

(បទកាកគតិ)

  ១ .     មេឃមីខ្មៅអែ              ស្ទើរពេញស្រុកខ្មែរ      ទួញសោកអង្រួន

            ហាក់ដឹងរឿងពិត         ខ្លោចចិត្តជាប់ខ្លួន         ខ្មែររងទុក្ខផ្ទួន

                                              ទឹកលិចភូមិស្រុក។

  ២ .     ស្រូវស្រែដំណាំ           រស់រងទុក្ខកម្ម              ពិបាកនៅសុខ

            លិចលង់រលួយ           ខូចត្រួយចាប់ចុក         ជាមួយអ្នកស្រុក

                                              ប្រជាខេមរា។

​  ៣ .     សូម្បីបុណ្យជាតិ          ឆ្នាំនេះត្រូវឃ្លាត           ភ្លេចពីនេត្រា

            ប្រទីប.អុំទូក                គ្រូកៗសង្ហារ               អុំលើជលសា

                                              ឃ្លាតទំាងអាល័យ។

  ៤ .     ថាចុះឆ្នាំមុន                ទុក្ខខ្មែរសែនធ្ងន់          ហាក់នៅស្រមៃ

            ខ្មែរស្លាប់ច្រើនហើយ   នៅឡើយចង្រៃ           ឆ្នាំនេះថោកក្រៃ

                                              ទឹកជំនន់ទៀត។

  ៥ .     សូមទុក្ខឃ្លាតទៅ         ផ្តល់មង្គលនៅ             គ្រប់ខ្មែរឥតឃ្លាត

            ផ្តល់លាភ.សិរី             ឈ្នះភ័យកម្មជ្រៀត      ខ្មែរសាមគ្គីជាតិ

                                              ឈប់ព្យាបាទគ្នា។

នៅៈថ្ងៃសុក្រទី២១ ខែតុលា ឆ្នាំ២០១១ (ម៉ោងៈ ១១ៈ៤៥ នាទីថ្ងៃត្រង់)

លីម ចំរើន

http://limchamroeun.blogspot.com/

កូនគួរស្តាប់ឪ!

(បទកាកគតិ)

  ១ .     កុំជ្រើមកុំជ្រួល             កុំផ្តេកកុំផ្តួល               រមួលតាមចិត្ត

            ឃើញរូបខាងក្រៅ       កុំខ្លៅឥតគិត               កាមរាគជាប់ស្អិត

                                              អាប់អស់បញ្ញា។

  ២ .     កើតមកជាប្រុស          កុំនាំឲ្យខុស                 គ្រោះព្រោះតណ្ហា

            វង្វេងមាស.ប្រាក់         បុណ្យសក្កិដុល្លារ         ឆ្កួតល្បែងស្រីស្រា

                                              ខូចយសពូជផៅ។

  ៣ .     ធម្មតាស្រីល្អ               មិនមែនរូបស              ល្អតែខាងក្រៅ

            កាយគង់ទ្រុឌទ្រោម     ស្វិតស្គមជាំខ្មៅ           កូនពិតសោកសៅ

                                              អាចស្តាយពេលក្រោយ។

  ៤ .     ស្រីដែលល្អពិត           សំដៅគំនិត                 ចេះគិតឆ្លងឆ្លើយ

            មិនស្តីឡិកឡក់           ម៉្ញិកម៉្ញក់ជ្រើមឡើយ      ប្រយ័ត្នមុខក្រោយ

                                              មារយាទខ្ជាប់ប្រាណ។

  ៥ .     កូនគួរស្តាប់ឪ!             ពាក្យចាស់ច្រើនត្រូវ     តាំងពីបុរាណ

            លោកប្រឹងផ្តែផ្តាំ          ចំណាំប្រាប់ហាម         បើកូនធ្វើតាម

                                              ផ្តល់តែមង្គល។                  

នៅៈថ្ងៃសុក្រ ទី២១ ខែតុលា ឆ្នាំ២០១១ (ម៉ោងៈ ២០ៈ៤៥ នាទីយប់)

លីម​ ចំរើន

http://limchamroeun.blogspot.com