គុកឥតស្រមោល

(បទកាកគតិ)

១    .     ខុសហើយខុសទៀត         ជាប្រុសចោលម្សៀត     ថោកជាងតិរច្ឆាន

            ភ្លេចកូនប្រពន្ធ                 កាមគុណជាប់ប្រាណ   នាំភ្លើងសាមាន្យ

                                                ដុតក្រុមគ្រួសារ។

២    .     បើធ្លាប់ខុសហើយ            ល្មមភ្ញាក់ខ្លួនឆ្លើយ        គួរខ្លាចរអា

            ស្រីស្រាខាងក្រៅ             ភ្លើងក្តៅឧបមា             ពាក្យចាស់លោកថា

                                                ដូចផ្ទីអាច់មាន់។

៣   .     ល្អតែរូបទេ                      គំនិតវៀចវេ                 ពិបាកតាមទាន់

            ខុសកូនប្រពន្ធ                 ចិត្តធ្ងន់រយពាន់            ឯផ្ទីអាច់មាន់

                                                កុំបីស្រណោះ។

៤    .     កូនគួរគប្បី                      គិតគូរជាថ្មី                  ឲ្យគ្រប់ចន្លោះ

            ចំណេញឬខាត                សង្វាតប្រឹងដោះ          ឈប់ជាប់ឃ្នាងខ្នោះ

                                                គុកឥតស្រមោល។

លីម ចំរើន

នៅៈថ្ងៃពុតទី០៨ ខែកុម្ភៈ ឆ្នាំ២០១២ (ម៉ោងៈ ៩ៈ៣៥ នាទីព្រឹក)

Tel: ០១២ ៥១៩ ១៣៧/០១១ ៣៧៨ ១៧១/010 730 083

http://limchamroeun.blogspot.com

ផឹកស៊ីសប្បាយ

 

(បទកាកគីតិ)

    ១.ផឹកស៊ីសប្បាយ       លលូកលែបខាយ      សប្បាយឡូឡា

       ញ៉េះញោះញ៉ែរញ៉ង ផ្តោះផ្តងវាចា             ឌឺដងដូចស្វា

                                  ឬកដូចសេដ្ឋី។

   ២​.ផឹកស៊ីសប្បាយ      ហាក់សមបូរណ៌ចាយ អ្នកខ្លះអត់ឆី

       តែបទបានស្រា      ស្តីថាឥតភ័យ            សម្ញែងអួតស្រី

                                  ដូចឯងគ្រាន់បើ។

   ៣.ផឹកស៊ីសប្បាយ      ភ្លេចអស់ពាក្យម្តាយ    ប្រាប់ឲ្យកូនដើរ

       កុំឆ្កូតស្រីស្រា         កូនណាប្រសើរ          ខ្លាចស្ពាយបញ្ញើ

                                  រោគាជាប់ខ្លួន។

   ៤.                            ផឹកស៊ីសប្បាយ          កូនកុំលង់កាយ   ឲ្យខុសធ្ងន់ផ្ទួន

       ឆ្កួតបីគួរខ្លាច          កំណាចណាស់ស្ងួន    បើវក់ភ្លេចខ្លួន

                                  កូនពិតស្តាយក្រោយ។  

លីម ចំរើន

២៦.០១.២០១២

http://limchamroeun.blogspot.com

មេក្រូ

(បទកាកគតិ)

  ១  .     សម្រែកមេក្រូ[1]                 លាន់លឺស័ព្ទសូរ          ខ្ទ័រខ្ទារសុសសាយ

            អ្នកមិនស្គាល់ជាក់            ញ័រញាក់ព្រឺកាយ         តែគួរឲ្យស្តាយ

                                                គេយល់ឫកច្បាស់។

  ២  .     មេក្រូប្រឹងស្រែក               បែបបទច្រើនប្លែក         សម្បើមខ្លាំងណាស់

            ជំនាញរំខាន                   សព្វឋានមុខក្រាស់       ហាក់កាងអាងម្ចាស់

                                                អ្នកចាក់បញ្ជា។

  ៣ .     ផ្យាយល្អអាក្រក់               មិនឈប់ដំអក់             ទោះក្តៅរងា

            មិនយល់អ្នកផង               សៅហ្មងគ្រាំគ្រា          យំយែកទាមទារ

                                                ក៏ឥតតម្លៃ។

  ៤  .     មេក្រូមិនខ្វល់                  ប្រជាកុំឆ្ងល់                 រស់នៅសព្វថ្ងៃ

            កុំប្រឹងស្រែកតាម              ខ្ញុំហាមរាល់ថ្ងៃ             មេក្រូលឺក្រៃ

                                                ខ្លាំងព្រោះមនុស្ស។

នៅៈថ្ងៃសុក្រ ទី០៣ ខែកុម្ភះ ឆ្នាំ២០១២ (ម៉ោងៈ ១៦ៈ៣៥ នាទីថ្ងៃល្ងាច)

Tel: ០១២ ៥១៩ ១៣៧/០១១ ៣៧៨ ១៧១/010 730 083

---

[1] មេក្រូ គឺ ជាឧបករណ៍ផ្សាយសម្លេងដែលគេនិយមប្រើពេលមានបុណ្យទានឬឃោសនាផ្សេងៗ

http://limchamroeun.blogspot.com

ផ្ទះចិនផ្ទះខ្មែរ

(បទកាកគតិ)

              ១.    ផ្ទះចិនផ្ទះខ្មែរ                           ខ្ញុំកូនអ្នកស្រែ                      ក្បែរផ្ទះអ្នកមាន

                      ចិនគេសម្បូណ៍                        ទ្រព្យចូលច្រើនលាន           ស្រូវស្រែរុករាន

                                                                   ច្រើនរាប់ហិចតា។

              ២.   ចៅចិនគំនិត                            សក់មួយជ្រៀកល្អិត             គិតសព្វក្រឡា

                      ទិញចូលលក់ចេញ                   ចំណេញអស្ចារ្យ                  ចិនគេឧស្សាហ៍

                                                                   បញ្ញាជាងខ្ញុំ។

              ៣.   ហេតុអ្វីខ្ញុំក្រ?                           ព្រោះខ្ញុំមិនល្អ                     រកតិចចាយធំ

                      បងប្អូនខ្ញុំច្រើន                         ក្រវើនខ្ជិលផ្តុំ                       ប្រាថ្នាសុខុម

                                                                   មិនប្រឹងស្ទុះស្ទា។

              ៤.    មិនសូវស្វះស្វែង                      មិនខ្មាស់គេឯង                   ចិនផ្ទះជាប់គ្នា

                      ខ្ញុំយំគេសើច                            សំណើចនិន្ទា                      ដៀលត្មេះពូចធារ

                                                                   គ្រួសារឆោតល្ងង់។

              ៥.    ពេលណាខ្ញុំភ្ញាក់?                     គ្រួសារឈប់ធ្លាក់                ផុតទុក្ខអន្លុង

                      សមុទ្រទឹកភ្នែក                        យំយែកជាប់ជុង                  ឈប់ធ្វើកុកល្ងង់

                                                                   ប្រឹងប្រែងដូចគេ។

              ៦.    ខ្ញុំសូមសច្ចា                             ក្នុងនាមខេមរា                    មិនខុសទៀតទេ

                      សាមគ្គីសាមគ្គា                        ស្រុះគ្នាឥតរេ                       ឈប់ឲ្យចិនជេរ

                                                                   ដៀលពូជខ្ញុំទៀត។                    

       នៅៈថ្ងៃសៅរ៍ ទី២៨ ខែមករា ឆ្នាំ២០១២ (ម៉ោងៈ ១៧ៈ៣៥ នាទីថ្ងៃល្ងាច)

Tel: ០១២ ៥១៩ ១៣៧/០១១ ៣៧៨ ១៧១/010 730 083

http://limchamroeun.blogspot.com

ល្បែងស្នេហ៍ចិត្តឯង

(បទកាកគតិ)

១    .     មាត់ខ្ញុំសប្បាយ                ចិត្តខ្ញុំនិងកាយ             ហាក់ស្រពោនស្វិត

            ដូចមេឃស្រឡះ              ប្រែផ្លាស់ងងឹត             ពពកខ្មៅជិត

                                                ពន្លឺមិនឆ្ងាយ។

២    .     មាត់បន្លប់ចិត្ត                  បំភាន់ការពិត              ទ្រាំស៊ីដូចបាយ

            ទំពាទុក្ខព្រួយ                  រលួយក្នុងកាយ            ទោះស្អុយមិនឆ្ងាយ

                                                ចិត្តកាយគ្រាំគ្រា។

៣   ​​.     នាមប្រពន្ធប្តី                    គ្រួសារឥតន័យ            ដូចកម្មផ្តន្ទា

            រឹងរូសមានៈ                    យកឈ្នះចាញ់គ្នា         កូនចៅវេទនា

                                                មិនដឹងហេតុផល។

៤    .     ល្បែងស្នេហ៍ចិត្តឯង          ម៉ែ.ឪឥតក្រែង              ពិតព្រួយសោកសល់

            គ្មានលេសអ្វីអាង             កម្មសាងផ្តល់ផល        ទ្រាំលេបកង្វល់

                                                ដើម្បីបុត្រភ្ងា។

នៅៈថ្ងៃសៅរ៍ ទី០៤ ខែកុម្ភៈ ឆ្នាំ២០១២ (ម៉ោងៈ ២១ៈ៣៥ នាទីថ្ងៃយប់)

Tel: ០១២ ៥១៩ ១៣៧/០១១ ៣៧៨ ១៧១/010 730 083

http://limchamroeun.blogspot.com