កូនស្រីភ្ញាក់ឡើង

(បទពំនោល)

     ១.  កូនស្រីភ្ញាក់ឡើងណាពៅ          អាសូរម៉ែឪ                   រងនូវទឹកភ្នែករាល់ថ្ងៃ។

     ២. ព្រោះតែកូនស្រីថ្លើមថ្លៃ             បំផ្លាញតម្លៃ                  ស្រីថ្លៃមាសមេខ្លួនឯង។

     ៣. ដើរលេងសប្បាយឥតក្រែង       ស្នេហ៍ស្និទ្ធអួតស្តែង       សម្ញែងមិនខ្មាស់អ្នកផង។

     ៤.  កៀកអើយផ្អែមល្ហែមអូនបង      ​នៅមុខក្រោយខ្នង         តបស្នងសងគុណឪម៉ែ។

     ៥.  ធ្វើខ្លួនចរិតប៉ោឡែ                   ខ្វះញាតិគេស្នេហ៍          មានតែនិយាយដើមហុយ។

     ៦.  កិត្តិយសខូចខុសប្រែផុយ          ហាក់រលួយស្អុយ           ក្លិនហុយអសោចគ្រួសារ។

     ៧. គ្មានចិត្តអាសូរម៉ាក់ប៉ា               ទ្រូងសែនខ្លោចផ្សា        ហួសថ្លាថ្លែងបៀមទុក្ខព្រួយ។

     ៨.  ពិតជាត្រូវការជំនួយ                 ឲ្យកូនស្រីស្ទួយ             សោះជួយព្រួយសោកនៅមុខ។

     ៩.  សូមឲ្យប៉ាម៉ាក់ផុតទុក្ខ               ទ្រូងក្តៅគគុក               នៅមុខរលាយសោះសូន្យ។

     ១០.ឱកូន!កូនស្រីអើយកូន             សូមធ្វើជាក្បូន              សណ្តូនចំលងម៉ែឪ។ `

     ១១.នាំទុក្ខសូមកុំឲ្យនៅ                 លុបលាងអាស្រូវ           ម៉ែឪមានកិត្តិយស។

     ១២.គ្រួសារយើងបានខ្ពង់ខ្ពស់         កូនស្រីពីរោះ                មានឈ្មោះកូនកតញ្ញូ។

     ១៣.អ្នកផងពិតយកគំរូ                  កូនឈប់មូទូ                 គិតគូកិត្តិយសគ្រួសារ។

     ១៤.អ្នកផងគេកោតរអា                 កូនស្រីបញ្ញា                 រក្សាតម្លៃខ្លួនឯង។

     ១៥.ម៉ែពុកមិនមែនកំប្លែង               ការពិតជាក់ស្តែង           ត្រូវក្រែងថែវង្សត្រកូល។               

លីម ចំរើន

០៩.០៤.១២

http://limchamroeun.blogspot.com